Emakumeen eskubideen aldeko hitzaldiak emango dira EHUko Leioako Campusean

Beldur Barik elkarteak feminismoaren inguruko jardunaldia antolatu du Magisteritza fakultatean. Berdinsarea erakundeak antolatu du ekitaldia, Emakunde eta Euskadiko diputazioen laguntzarekin, besteak beste. Bitartean, Gizarte eta Komunikazio zientzien fakultatean ‘Emakumeen ikusgaitasuna hedabideetan’ izeneko hitzaldia egongo da.

Beldura Barik jarrera! izeneko hitzaldia, urriaren 19an izango da, Magisteritzako fakultatean, eguerdiko 12etan. Azkenengo ekitaldia izango da; aurrez, Gasteizko eta Donostiako Magisteritzako eskoletan izan zen, urriaren 7an. Hitzaldiaz gain, lehiaketa bat ere antolatu du elkarteak. Berdintasunaren aldeko eta emakumeenganako indarkeriaren aurkako norberaren “artelanak” aurkeztu daitezke.

Bestalde, beste hitzaldiari dagokionez, sexualitatearen eraikuntza lurrinen iragarkietan, estimulu komunikatiboak eta erreproduzitutako sexualitate ereduak, botere erotikoa, eta sexismoa publizitatean, bezalako gaiak landuko dira hitzaldian. Eta, arratsaldeko 15:30etan “Publizitatearen analisia genero ikuspuntutik” tailerrean parte hartu ahal izango du nahi duenak. 

Urriaren 20an berriz, bideojokuen arloari begiratu zaio gehienbat; gizon eta emakumeen irudiak bideojokoetan duen eragina, sexuen hezkuntza eta honen ondorioak bizitzan eta emakume jokalarien irudia zine eta telesailetan aztertuko dute, besteak beste. Eta arratsaldean berriz, “publizitatearen analisia genero ikuspuntutik” izeneko tailerra egongo da, aurrekoaren ordu berean.

GKZko fakultateko 22. gelan izango da hitzaldi hau. Euskaraz izango da, eta parte hartzaileei aukera askeko kreditu bat emango zaie.

Afrikako emakumeen aldeko borroka sarituko du aurtengo Bakearen Nobel Sariak

Ellen Johnson Sirleaf, Leymah Gbowee eta Tawakkul Karman-ek jasoko dute aurtengo saria

Ostiralean jakinarazi zuen Norvegiako Nobel Sariaren batzordeak 2011ko Bakearen Nobel Sarituak nortzuk ziren. Aurtengo sariak, Afrikako emakumeen aldeko mugimendua sarituko du.  Ellen Johnson Sirleaf Liberiako presidentea, Leymah Gbowee Liberiako ekintzailea eta Tawakkul Karman Yemengo ekintzailea izan dira sarituak. Batzordearen hitzetan, “emakumeen segurtasunagatik eta emakumeek bakearen eraikuntzan parte-hartze osorako duten eskubidearen alde egindako indarkeriarik gabeko borrokagatik” sarituko dituzte.

Ellen Johnson Sirleaf, Liberiako Gobernuko presidentea da 2006az geroztik. Afrikan demokratikoki aukeratutako lehen emakume presidentea da. Leymah Gbowee berriz, herrialde bereko gerra bukatzea lortu zuen mugimendu bakezalearen sortzailea da. Azkenik, Tauakkul Karman, Yemengo politikari bat da; emakumeen, demokraziaren eta bakearen alde egin du.

TRADIZIOA

Tradizioa, Euskal Herriaren kultur ondare garrantzitsuenetarikoa dela esan dezakegu. Berezia, bakarra... Izan da baina euskal gizartearen eta bereziki hedabideen arreta bereganatu duen tradizio bat azken asteotan. Hondarribiko alardea, hain zuzen ere.

Tradizioari jarraiki, gizonezkoak izan dira Hondarribiko alardearen protagonista orain arte. 1996 az geroztik baina, emakumeak alardean presentzia izatera heldu dira. Baina ez nola nahiko presentzia. Kaleko jendeak plastiko beltza jartzen diete beraiek desfilatzen duten bitartean; eta hori gutxi balitz, txistuak eta mehatxuak jasan behar izaten dute. Horrez gain, aurten Herrizaingo Sailak ibilbidea eta ordutegia aldatu dizkio alarde mistoari.

Zilegi al da horrelako momentuak pasa behar izatea, zure herriko tradizio batean parte hartu gura izanagatik? 

Hondarribiarrei ahaztu ez bazaie ere, XXI. mendean gaude eta gauzak ez dira lehen bezala. Guztiak eboluzionatu egin du; edo beste modu batera esanda, aldaketak jasan dituzte. Hizkuntzak, janzkerak, ohiturak eta beste milaka izan dira denboraren poderioz aldaketak jasan dituztenak. 

Eta beraz, zergatik ezin du tradizioak ere eboluzionatu? Zergatik ezin du aldaketarik jasan? Zergatik ez dute ulertu gura, aldaketak jasanda ere tradizio izaten jarraituko lukeela?

Badira urte asko berdintasunerako bidea egiten ari garela. Baina Hondarribiko tradizio honek, herritarrek erakutsitako jarrera guztiz matxistak, zein erakunde eta politikariek izandako jarrerak, atzera pausuak besterik ez dira berdintasun eta normaltasun baten bizi nahi duen gizartearentzako.