Goi-mailako sukaldaritza ikasketak eskainiko dituzte Donostiako Basque Culinary Center unibertsitate berrian. Hain zuzen, Miramonen kokatutako zentroaren ateak eguerdian zabaldu dituzte. Bertan izan dira, besteak beste, Espainiako printze-printzesa, Cristina Garmendia Espainiako Gobernuko Berrikuntza ministroa, Patxi Lopez Eusko Jaurlaritzako lehendakaria, Arantza Quiroga Eusko Legebiltzarreko presidentea, Javier de Andres Arabako ahaldun nagusia, Isael Zelaa eta Iñaki Arriola Jaurlaritzako sailburuak, Antonio Basagoiti EAEko PPko presidentea eta Markel Olano EAJko Gipuzkoako batzarkidea.
Martin Garitano Gipuzkoako ahaldun nagusia ez da izan inaugurazioan. Izan ere, Espainiako printzeak izan dira han eta Gipuzkoako ahaldunak dioenez “Euskal Herriaren ukazioaren ikur” dira. Hala ere, Juan karlos Izagirre Donostiako alkatearekin batera joan da arratsaldeko zazpietan ekitaldi sozialera, eta han hartuko dute parte. Euskal herriko sukaldari onenak ere ekitaldira hurreratu dira.
Mondragon Unibertsitateak kudeatuko du Basque Culinary Center. 320 ikasletatik hautatutako 56 ikaslek emango diote hasiera unibertsitate berriari. Azpiegitura guztia hamalauko taldeetan lan egiteko antolatu dute, sukaldeak eta tailerrak barne. Gainera, ikerketa zentroa eta dastatzera bideratutako gelak ere badituzte BCCn. Iosu Zabala, Mondragon Unibertsitateko errektoreak dioenez “ametsa” bete dute Goi-mailako sukaldaritza unibertsitatea zabalduta.
Hainbat dira sukaldaritzako unibertsitatean aurki daitezkeen adarrak: jatetxeetan aritzeko sukaldariak; etxeetan zerbitzatzekoak, hau da, cateringa; Industria sukaldaritzari buruzkoa (jantoki handietan zerbitzatzeko, adibidez, ospitaletan), etab.
No hay comentarios:
Publicar un comentario